تستمع الآن

أخصائية نفسية: تعرف إنك نجحت في تربية أولادك عندما يتصرفوا في غيابك مثل وجودك

الخميس - ٠٩ أغسطس ٢٠١٨

تُعد فترة المراهقة وكيفية التعامل مع الأطفال في هذا السن من أصعب التحديات التي تواجه الأباء.

وفي هذا السياق، قالت ليديا جاد الله الأخصائية النفسية، إن الأم تعرف أنها نجحت في تربية ولادك عندما يتصرفوا في غيابها مثل وجودها، ويحترموا الأهل في وجودهم وفي غيابهم.

وأضافت ليديا جاد الله خلال حوارها مع رنا خطاب في برنامج “بنشجع أمهات مصر” على نجوم إف إم “اللي يقلقك في فترة المراهقة هي التغييرات المفاجئة، الطفل في المرحلة دي بيبقى محتاج مكان ومساحة في بيته إنه يقول رأي وإن الرأي ده يحترم، في دخلة سن المراهقة الطفل بيبدأ يجنبك التفاصيل ولو عمل كدة سيبيه لحد ما يحصل تغيير مفاجئ ساعتها لازم أدخل في التفاصيل”.

وتابعت “سن المراهقة بيبتدي دلوقتي من 10 سنين لحد 18 أو 19 سنة. والطفل بيتولد ب حاجة اسمها المزاج العام زي إنه يبقى بشوش أو ملوش مزاج، وكمان قدرة الطفل على التعامل مع التغيرات، فتلاقي مثلا طفل مش بيعيط لو حد غير أمه شاله ويباكل من أي حد عادي”.

وعن الطريقة المناسبة للتعامل مع المراهق قالت “في جدول في علم النفس عبارة عن 3 حاجات اللازم والممكن وانت حر، كل ما الطفل بيكبر الـ “لازم” بتقل قصاد زيادة الـ “أنت حر”. اللازم دي بزرعها من سن صغير عشان ماينفعش مثلا يبقى عنده 22 سنه وانا بقوله لازم تذاكر”.

 ليديا جاد الله الأخصائية النفسية
ليديا جاد الله الأخصائية النفسية

وأردفت “إحنا زارعين الولاد في مجتمع معين ف ماينفعش افضل دايما اقولها تبقى غيرهم وتمشي العكس في كل حاجة وافضل أقول لأ دايما.. عشان كده زي ما قولنا قبل كدة الـ Should أو اللازم ضروري تتزرع في الأولاد من بدري عشان لما يوصلوا لسن المراهقة يكونوا هم خلاص اتزرع فيهم حاجات معينة ومبادئ معينة فماضطرش في الموقف نفسه في سن المراهقة أفضل أقول لا وأدخل في خناقات ومشاكل”.

أما عن كيفية الرد على طريقة الأبناء في التعامل قالت “عندنا فكرة حلوة في علم النفس اسمها Love games بعملها مش بس مع ابني لا مع كل الناس عادي. إن لو طفلي جالي واتعامل بأسلوب الـ child أتعمل أنا بأسلوب الـ adult وأتعامل بحب ودعم لأن ده دوري كأم إني أدعم أولادي وأحبهم”.

وأضافت “البنات مشاكلهم في سن المراهقة في رأيي بتبتدي من عند الأمهات، البنت محتاجة إني أزرع فيها ثقة وحب وتدليل، لما بزرع ثقة البنت في نفسها مش بتحتاج تاخد ده من بره”.

واختتمت “الحِمل على الأمهات كتير وتقيل، بس في حاجة مهمة مع الاطفال في سن المراهقة وهي قد ايه انا متاحة لأولادي، لو ابنك جه يتكلم معاكي أو يصحيكي مخصوص عشان يتكلم معاكي في حاجة هو محتاج إنك تسمعيه وتهتمي بالحاجة اللي بيقولها. وأهم حاجة إني مافضلش أقارن ابني بقرايبه وأصحابه، لأن أنا المفروض أكون عايزاه أحسن نسخه من نفسه هو مش أحسن من غيره”.


الكلمات المتعلقة‎


مواضيع ممكن تعجبك