تستمع الآن

استشاري العلاقات الزوجية: الملل قد يحدث قبل الزواج لكن يتجاهله المخطوبين

الخميس - ٠٥ يوليو ٢٠١٨

قال الدكتور محمد وديد أخصائي الطب النفسي واستشاري العلاقات الزوجية أن العلاقة الزوجية ممكن أن تتحول من حافز ومشجع للإقبال على الحياة لعبء على الأشخاص بسبب الفتور والملل.

وأضاف محمد وديد في حواره مع سارة النجار خلال برنامج “بنشجع أمهات مصر” على نجوم إف إم “في ناس بتفتكر إن الأمور هتفضل تمام وبنحب بعض والعلاقة كويسة بعد الجواز زي ما كنا أيام الخطوبة من غير أي جهد منهم وده غلط جدا”.

وعن أسباب حدوث الملل والفتور في العلاقة الزوجية قال “التراكم السلبي جوا الإنسان من الحاجات اللي بتسبب الملل. كمان عدم بذل الجهد اللازم لاستمرار العلاقة من مسببات الملل، لأن العلاقة زي الزهرة محتاجة تتسقي وتاخد بالك منها”.

أما عن معرفة إذا ما كانت العلاقة دخلت مرحلة الفتور قال “ناقوس الخطر إن الشخص يحس إنه مش مهتم، يعني يبقى عارف إيه اللي هيبسط شريكه وميهتمش يعمله، كده لازم ياخد باله إن العلاقة داخلة مرحلة الفتور”.

وأضاف “الجهد معناه إني أبقى فاهم إن الشخص اللي قدامي ده من كوكب تاني زي بظبط ما بيقول الكتاب اللي اسمه “الرجال من المريخ والنساء من الزهرة”. مثلا الست لازم تبقى عارفه إنها ماينفعش ترغي مع الراجل زي ما بترغي مع صحابها، لكن بردو الكلام مهم وهو لازم يبقى فاهم إنه ضروري يسمع مراته، عدم وجود حوار وقدرة إننا نسمع بعض هيسبب ملل”.

دكتور محمد وديد اخصائي الطب النفسي واستشاري العلاقات الزوجية مع سارة النجار

وعن أهمية الصدق لحل المشاكل الزوجية قال “الحل إني أشوف كست لو هو بيتكلم مع صحابه كتير ومعاكي لأ، ابدأي فكري طب أنا بتكلم في مواضيع زي إيه، طب الطريقة إيه، والراجل يفكر هل أنا بتكلم قليل عشان طبيعتك كراجل ولا عشان زهقان. لحظة صدق ممكن تغير الحياة. خليك صادق مع نفسك أنت بتعمل كدة ليه، وإنتِ كمان خليكي صادقة مع نفسك عشان توصلوا لحل سوا”.

وأضاف “أصعب حاجة هو إنه يكون الشخص نفسه مش عايز يتغير، لو هم عارفين إن في مشكلة في العلاقة ومش بيحاولوا ولا يصلحوها ولا ينفصلوا حتى وقرروا يتعايشوا كدة، ساعتها بيكون التغيير صعب”.

وفي سؤاله عن ما إذا كان الممل يمكن أن يحدث من قبل الزواج قال “الملل ممكن يحصل من قبل الجواز بس المخطوبين بيتجاهلوا ده، ممكن أشوف تصرفات أو تفاصيل بتحسسني بالملل بس بكبت الشعور ده، وده خطر جدا”.

وأردف “هتعرف إنك داخل على فتور في العلاقة لما تبدأ تتصرف بميكانيكية وبتعمل الحاجة دي عشان لازم تعملها مش عشان أنت عايز تعملها. وده مش معناه نهاية العلاقة ده معناه إننا لازم ناخد بالنا ونركز عشان نحل المشكلة”.


الكلمات المتعلقة‎


مواضيع ممكن تعجبك