تستمع الآن

استشاري الطب النفسي: اضطراب فرط الحركة ونقص الانتباه مرض وراثي وهذه هي أعراضه

الأحد - ٠٨ يوليو ٢٠١٨

أكدت العديد من الدراسات أن اضطراب فرط الحركة ونقص الانتباه مرض وراثي، نافين أن تكون العوامل البيئية لها دور كبير في الإصابة بالمرض.

وعن أعراض فرط الحركة قالت صفاء عراقي خلال حوارها مع سارة النجار في برنامج “بنشجع أمهات مصر” على نجوم إف إم: “أعراض فرط الحركة بتظهر من أول ما الطفل بيكون في بطن الأم وبتلاحظ زيادة في حركته، وبعدين في مرحلة الحضانة لما الطفل بتظهر عليه فرط الحركة مقارنة بباقي الأطفال، لكن الأمهات غالبا بتلاحظ الموضوع ده في مرحلة الابتدائي”.

اكتشاف اضطراب فرط الحركة

وعن كيفية ملاحظة اضطراب فرط الحركة عند الطفل قالت “مش كل طفل حركته كتير يبقى عنده فرط حركة، بقول إن اللي عند الطفل ده فرط حركة لما يبقى عامله مشكله أو تأثير على وظيفته، زي إن درجاته وحشه أو صحابه بطلوا يلعبوا معاه عشان حركته زيادة وانتباهة قليل”.

وأضافت “لما الأطفال بيقضوا وقت أكتر من ساعتين في اليوم على التليفزيون أو الإلكترونيات معدل العنف في التعامل عند الطفل بيزيد، وكمان ليها تأثير سلبي على الطفل اللي عنده نقص انتباه أنها بتزود المشكلة دي”.

وتابعت “زي أي مرض، كل ما التدخل كان بدري كل ما العلاج كان فعال أكتر. لو تم اكتشاف الاضطراب ده متأخر خلال مرحلة المراهقة، التدخل العلاجي ساعتها هو الحل الأول لأن العلاج السلوكي مش هيكون له تأثير قوي مع المراهق”.

صفاء عراقي وسارة النجار
صفاء عراقي وسارة النجار

وعن الطريقة الأفضل لإعطاء الأوامر للطفل قالت “الصيغة اللي بطلب بيها الحاجة من الطفل مهمة، زي إنها ماتحملش سؤال عشان مايبقاش في مجال للرفض. وكمان مايبقاش في عنف أو هجوم في الطريقة، وإن يبقى في عواقب للحاجة اللي بقوله يعملها، سواء عواقب إيجابية زي مكافأة أو عواقب سلبية زي الحرمان من المكافأة. والالتزام في تنفيذ المتفق عليه مع الطفل مهم جدا”.

سبب التشخيص المتأخر

أما عن أسباب التشخيص المتأخر للمرض قالت “اكتشاف المرض متأخر ممكن يبقى بسبب درجة المرض، لأنه زيه زي أي مرض له درجات وممكن يبقى حد مصاب بيه بس بدرجة قليلة فالأهل مايلاحظوش بسرعة، وكمان بسبب إن الأب والأم محتملين أعراض المرض ده ومتعايشين معاها عادي، لكن ده لحد مرحلة معينة لما يبدأ يبقى على الإبن مسؤوليات أكتر فيبدأ الأب أو الأم يلاحظوا وجود المشكلة”.

وأردفت “الأطفال اللي عندهم فرط حركة أو نقص انتباه بيكون وراثه من الأب بنسبة 60%، عشان كدة وإحنا بنقيم الطفل لازم نركز مع الأب والأم كمان”.

وأختتمت “لو أي ولي أمر شك إن ابنه عنده مشكلة لازم يستشير حد متخصص. من أهم الحاجات إننا نعلم أولادنا يبقوا مسؤولين ونعمل نظام معين للبيت ونمشي عليه، ضروري كمان إن الأب والأم يحافظوا على هدوئهم”.


الكلمات المتعلقة‎


مواضيع ممكن تعجبك