تستمع الآن

لعب دور الضحية واحدة من أهم صفات الشخص السيكوباتي

الثلاثاء - ٢٦ يونيو ٢٠١٨

قال إسماعيل قاسم مدرب الحياة “Life coach”  أن العلاقة المدمرة أو العلاقة السامة هي العلاقة التي توقفك عن تحقيق أحلامك وتحعلك تشك في نفسك وتحبطك. وأوضح أن الإنسان السيكوباتي يفضل لعب دور الضحية والشخص المظلوم.

وعن صفات الإنسان السيكوباتي، قال إسماعيل قاسم، خلال حواره مع رنا خطاب في برنامج “بنشجع أمهات مصر” على نجوم إف إم: ” الشخص ده بيزود في بداية العلاقة من الإطراء والمجاملة لحد ما توقعي في الفخ، بعد كدة بيبدأ يحسسك إنه أحسن منك وإنك مش كفاية. والإنسان السيكوباتي بيبرر حاجات مش محتاج يبررها وبيكدب كذبات خايبة وملهاش لازمة. والشخص ده حساس جدا ناحية نفسه لأنه من جواه ضعيف وتصرفاته دي نابعة من ضعفه، ومن ناحية اللي قدامة مش بيحس بأي حاجة مهما عمل فيكي مش هيأثر فيه ويحس هو بيعمل فيكي إيه”.

وأضاف: “السيكوباتي دايما عايز يكسب ف بيحسس اللي معاه إنه خسران لأنه طول الوقت هو اللي عايز يكسب لوحده. وبيطلع اللي قدامه غلط على طول. مهما حاولتي هيطلعك بردو غلطانة ومش صح ومش كفاية. كمان القوة والسيطرة، من أهم صفاته وبيحس إنه عايز يسيطر ويبقى في موقف قوة دايما”.

وتابع: “مشاعره سطحية جدا، مش بيحس بحب شديد أو حزن شديد، لأن قلبه ميت”.

رنا خطاب وإسماعيل قاسم
رنا خطاب وإسماعيل قاسم

أما عن أسباب تكون الشخصية السيكوباتية قال: “في نظرية اسمها الصفحة البيضة في علم النفس، وكل حاجة بتتحط في الصفحة دي بتيجي من البيئة المحيطة والمواقف اللي بيمر بيها. وفي نظريات تانية بتقول إن الأطفال بيتولدوا بشخصيات معينة وبتظهر من طفولتهم. لكن مفيش سبب واضح وقوي في علم النفس عن ليه الشخص بيطلع سيكوباتي”.

وأردف: “الشخص السيكوباتي مش ضروري يكون راجل، في طبعا ستات كتير شخصيتهم سيكوباتية، ولكن نسبة الرجال السيكوباتيين أكثر”.

وعن طرق سيطرة الشخص السيكوباتي على شريكه قال: “أوقات كتير سلاح من أسلحة الشخص ده إنه يعزلك عن كل حاجة ويحسسك إنك محتجاه دايما. عشان كدة إفصلي كل حساباتك الشخصية عنه خلي عندك دخلك الخاص وفلوسك بعيدة عنه، عشان مايجبركيش إنك تفضلي معاه وتستمري في العلاقة عشان محتجاه ماديا. خلي علاقتك بأهلك قوية عشان هتحتاجي دعم نفسي منهم لو إنتِ في علاقة مع شخص سيكوباتي”.

وعن تعامل الشخص السيكوباتي مع أطفاله قال: “الشخص ده غالبا بيكون بيحب أولاده جدا بنفس درجة حبه الشديد لنفسه. لكن لو اتجوزتي شخص سيكوباتي حاولي تقليلي تواصله مع الأطفال في أوقات العصبية وخلي التواصل بينهم في وقت يكون الشخص السيكوباتي هادي ولذيذ. وماتتكلميش عن الأب ده وحش قدام الأطفال حتى لو انفصلتوا عن بعض عشان الأطفال يطلعوا متزنين”.


الكلمات المتعلقة‎


مواضيع ممكن تعجبك