تستمع الآن

نهى عابدين لـ “عيش صباحك”: سعيدة بوجود دراما مصرية قوية خارج الموسم الرمضاني

الخميس - ٠٣ مايو ٢٠١٨

قالت الفنانة نهى عابدين أنها تقوم حاليا بتصوير مسلسلين للمشاركة في موسم رمضان، وهم “لدينا أقوال أخرى” الذي تقوم ببطولته الفنانة يسرا، ومسلسل “أمر واقع” بطولة الفنان كريم فهمي.

وأكدت خلال حوارها مع مروان قدري وزهرة رامي في برنامج “عيش صباحك”: “مسلسل ونوس من الحاجات النادرة والتأليف فوق الرائع ومخرج المسلسل ساعدنا كتير إننا نقدر نتمكن من أدورنا”.

وعن دورها في مسلسل حلاوة الدنيا قالت: “لهجتي الإسكندرانية خدمتني في إظهار شخصية شهد في مسلسل “حلاوة الدنيا”. الشخصية طبيعتها معقدة شوية، في البداية تبان شخص شرير أو خبيث وبعد كدة تفهم إنها إنسانة كويسة لكن عندها بعض العقد من الماضي”.

أما عن تجربة مسلسل “الشارع اللي ورانا” قالت: “تجربة العمل مع المخرج مجدي الهواري كانت ممتعة. كنت متصورة أنه عمل زي أي عمل وهدخل أصوره وخلاص، لكن الحقيقة كانت غير كدة، هو عمل بيننا كيمياء جامدة جدا. دايما معروف إن أي مسلسل في ستات كتير بيحصل نفسنه وحوارات لكن مع مجدي الهواري ده محصلش خالص بالعكس عمل جو لطيف جدا في الشغل”.

وأضافت: “مبسوطة إن بقى في دراما مصرية قوية خارج الموسم الرمضاني، اتعودنا أن بعد رمضان بيبقى دايما دراما هندية وتركية وكورية لكن الوضع ده اتغير خصوصا في أخر سنتين وبقى في دراما مصرية قوية طول السنة”.

وأكدت: “المخرج زي الرسام اللي بيرسم لوحة والممثل جزء من اللوحة دي فطبعا المخرج لازم يوجه الممثل ولازم يكون له رأيه، لأن في النهاية هو المسؤول عن اللوحة”.

وعن رأيها في أهمية دراسة التمثيل بشكل أكاديمي قالت: “مش شرط الممثل يكون أكاديمي لأن التمثيل ده موهبة زي الرسم وزي الرقص، فكرة إني أحسنها بالدراسة ده كويس لكن مش شرط أساسي”.


الكلمات المتعلقة‎


مواضيع ممكن تعجبك