تستمع الآن

الحساسية ضد اللاكتوز.. كيفية اكتشافها وطرق التعامل معها

الخميس - ٠٣ مايو ٢٠١٨

يعاني بعض الأطفال من حساسية اللاكتوزمنذ الولادة ولكن يصعب على الأمهات اكتشافها أو يعجزن عن التعامل معها بشكل جيد.

وتحدثت شيرين إمبابي، أخصائية التغذية العلاجية، عن حساسية اللاكتوز خلال حوارها مع رنا خطاب في برنامج “بنشجع أمهات مصر” على نجوم إف إم: حيث قالت “بشكل عام لما بنكبر اللاكتوز طبيعي بيقل شوية في جسمنا. بس في ناس بيبقى عندها عامل وراثي ولما بيكبروا بيعملهم تحسس من اللاكتوز”.

وعن طريقة معرفة ما إذا كان الطفل أو المراهق لديه مشكله مع اللاكتوز قالت: “بنعرف الأطفال عندهم مشكلة في اللاكتوز ولا لأ من خلال إننا بنشيل اللاكتوز من النظام الغذائي بتاعهم لو حصل تحسن يبقى كدة هم عندهم مشكلة في اللاكتوز. كمان نقدر نشخص مشكلة عدم تحمل اللاكتوز من خلال تحليل الجينات الـ DNA  اللي ممكن بردو يعرفني لو أنا عندي مشكلة في اللاكتوز”.

شيرين إمبابي ورنا خطاب
شيرين إمبابي ورنا خطاب

وأضافت: “في طرق تانية كتير نعرف من خلالها الشخص عنده حساسية من اللاكتوز ولا لأ، أهمها اختبار الهيدروجين في هواء الزفير و فحص حموضة البراز”.

مشاكل اللاكتوز

وعن المشاكل التي يواجهها البعض بسبب اللاكتوز قالت: “من أكتر المشاكل اللي الناس بتواجهها بسبب اللاكتوز هي مشاكل الهضم والانتفاخ في المعدة والغازات، ومن الأعراض الخفية كمان الإرهاق وظهور الحبوب في البشرة”.

وأضافت: “معظم الناس اللي عندهم مشاكل في اللاكتوز بيجيلهم إسهال بسبب تراكم المياه في الأمعاء الدقيقة لعدم قدرة الجسم على هضم اللاكتوز وتحليله”.

وفي نصيحتها للأشخاص المصابة بحساسية من اللاكتوز قالت: “بلاش الأشخاص اللي عندهم حساسية من اللاكتوز يتجهوا للصويا لأنها مش مفيدة أوي زي ما أغلب الناس بيعتقدوا، خصوصا إن دلوقتي بقى موجود في مصر لبن خالي من اللاكتوز من جهينة ويفضل كمان الناس اللي عندهم مشكلة مع اللاكتوز يشربوا مياه كتير”.

وإجابة على أسئلة المتصلين عن فوائد الصيام وعلاقته بعلاج اللاكتوز قالت: “الصيام مفيد جدا للجسم، وبيقلل مشاكل الجهاز الهضمي بشكل عام لكن ملوش علاقة بتقليل مشاكل اللاكتوز”.

وأكدت: “كتر أكل الخضار الني بيتعب القولون عشان كدة أكل الخضار المستوي أحسن للجسم وللقولون”.

وعن قدرة الجسم على التعود على عادات غذائية جديدة قالت: “حاسة التذوق بتاخد 3 أيام عشان تتعود على حاجة جديدة أو تبطل عادة قديمة، لو متعود تشرب الشاي بسكر وجربت تشيله خالص، أول يوم هتقدر تشرب كمية قليلة تاني يوم ممكن تشرب نص الكوباية تالت يوم هتبدأ تشرب أكتر، وفي رابع يوم هتكون خلاص اتعودت وبتقدر تشربه عادي”.


الكلمات المتعلقة‎


مواضيع ممكن تعجبك