تستمع الآن

“بنشجع أمهات مصر”: أفضل الطرق لتتحسن صحتك في شهر رمضان

الأحد - ١٣ مايو ٢٠١٨

أكدت خبيرة التغذية فدا شتيلة، أن الإنسان يجب أن يحاول الاستفادة صحيا من رمضان قدر المستطاع لأن الصيام له فوائد صحية عديدة بجانب فوائده الروحانية.

وأضافت خلال حوارها مع رنا خطاب في برنامج “بنشجع أمهات مصر” على نجوم إف إم: “أول حاجة لازم نتجنب السكر الأبيض ونحاول نعمل الحلويات في البيت عن طريق العسل. كمان مهم تنظيم الوجبات في رمضان مش بس نعتمد على الفطار والسحور. وقت الفطار نبدأ بشرب المياه بكمية كبيرة لترطيب الجسم وبعد كدة نبدأ الأكل بتمرة لأن التمر في فوائد كتير لأنه بيرفع مستوى السكر في الجسم بشكل سريع لكن صحي. بعد كدة نبدأ نشرب الشوربة لتحضير المعدة لاستقبال الطعام. نستنى ساعتين ونصلي وبعد كدة نبدأ ناكل الوجبة الرئيسية. يفضل نحاول نتجب الرز الأبيض في الوجبة الرئيسية وناكل بروتين زي لحمة أو فراخ بس يفضل يكون غير مقلي. بعد الفطار مهم جدا نمارس رياضة حتى لو مشي لمدة نص ساعة”.

فدا شتيلة
فدا شتيلة

وعن أفضل طريقة لتناول الحلويات قالت: “لو كان لابد من أكل الحلويات زي البسبوسة والكنافة والقطايف يفضل نعملها في البيت ونعملها بالعسل الطبيعي أفضل من السكرر المكرر لأنه السبب في نزول السكر وطلوعه في الدم، وبكدة نكون ماحرمناش نفسنا وأولادنا من الحلويات لكن بردو أكلناها بشكل صحي”.

وأضافت: “أوقات من الصح إننا نسمع لجسمنا لأن أحيانا لما بنجوع وبنعوز ناكل حاجة معينة جسمنا بيكون محتاجها فعلا لكن أوقات كتيرة جسمنا بيكذب علينا. عشان كدة تقسيم الأكل على وجبات صغيرة خلال اليوم هو الأفضل والأصح لصحتنا وده كمان مش بيخلينا نحس بالجوع كتير خلال اليوم”.

أما عن طريقة فقدان الوزن قالت: “الرياضة المعتدلة هي التي تساعد على خفض الوزن أكثر من الرياضة الثقيلة، يفضل ممارسة الرياضة لساعة واحدة على الأكثر. كمان يفضل شرب مياه بشكل كبير لأنها بتساعد على فقدان الوزن”.

وعن صيام المرأة الحامل والأطفال قالت: “الحامل لازم تستشير طبيبها قبل أن تقرر أن تصوم، كمان لازم يكون في تنوع كبير في نوع الأكل اللي بتاكله عشان تاخد أكبر فايدة ممكنه. ولو هنخلي الأطفال يصوموا لازم ناخد بالنا جدا من أكلهم ونحاول نشربهم لبن عشان الكالسيوم وكمان نحاول نأكلهم خضار كتير، بس نعمل الخضار بشكل لطيف وجديد للأطفال عشان نشجعهم ياكلوه”.

وعن أهمية السحور قالت: “السحور من أهم الوجبات لأنه بيمدنا بالطاقة طول اليوم، ويفضل ناكل أكلات تقلل العطش زي الأكلات اللي فيها بوتاسيوم. ونشرب مياه بكميات كبيرة على مرات متفرقة”.


الكلمات المتعلقة‎