تستمع الآن

“بنشجع أمهات مصر”: كيف تحمي أبنائك من لعبة “الحوت الأزرق”

الخميس - ١٢ أبريل ٢٠١٨

قالت سالي الشيخ استشاري الطب النفسي وعلاج الإدمان، إن هناك نوع من الإدمان يسمى “الإدمان السلوكي”، أي أن يدمن الشخص لعبة أو سلوك معين ويكون ذلك محور يومه.

وأضافت خلال حوارها مع رنا خطاب في برنامج “بنشجع أمهات مصر” على نجوم إف إم:الإدمان السلوكي يؤدي لعزلة اجتماعية وممكن يسبب أمراض جسدية”.

وعن لعبة الحوت الأزرق قالت: “اخترعها طالب علم نفسي روسي. اللعبة قائمة على فكرة إن الحوت بيدي أوامر للمشاركين يعملوها، بتبدأ بحاجات سهلة وبعد كدة تدريجيا بتبقى أوامر مدمرة”.

كيفية تعامل الأهل

أما عن طريقة تعامل الأهل مع أولادهم قالت: “لازم يكون في مراقبة للأولاد وأشوف وأعرف إيه الألعاب اللي بينزلوها على الموبايل وهل هي مضرة ولا لأ، وأحدد عدد ساعات معينة يلعب فيها على الموبايل، ولازم ده يكون بالإقناع وأفهمة أنا ليه بعمل ده وإيه أضرار إنه يفضل قاعد على الكمبيوتر أو ماسك الموبايل لفترة طويلة”.

وأضافت: “المراقبة بتعتمد على الطريقة، ماينفعش ابني يبقى قاعد وفاجأه أشد منه الموبايل وأشوف بيعمل إيه، لازم كمان أحترم سن ابني أو بنتي، وأقوله إني حابة أشوف انت بتلعب إيه وتتفق معاه إنها هتدور في الموبايل، أو حتى تشوف وهو نايم عشان ماتضيقوش”.

وتابعت: “في أباء أو أمهات مايعرفوش صحاب أولادهم ومايعرفوش الأولاد فين وبيعملوا إيه، مهم إنهم يقربوا من أولادهم ويدخلوا جوا حياتهم، ويبقوا عارفين هم بيكلموا مين وبيخرجوا فين ويصاحبوا أولادهم. من الصحي إني أبقى عارفة سلوك أولادي. ولازم أتواصل دايما مع ابني وبنتي وأفهمم أنا ليه بعمل كدة”.

رنا خطاب وسالي الشيخ
سالي الشيخ استشاري الطب النفسي وعلاج الإدمان

ما هي اللازمة؟

وأردفت: “اللازمة – حركات بالوش والجسم – دي حاجة اسمها تكس وبتبقى غير إرادية وبتدل على توتر وقلق، نعالج ده عن طريق الجلسات النفسية والعلاج الدوائي لو احتجناه، والعلاج الجماعي “Group therapy”.”

وفي سؤالها عن علاقة السوشيال ميديا بالحسد قالت: “السوشيال ميديا بتخلي شخص ممكن يكون محروم من حاجة معينة يفضل يشوفها عند ناس تانية ف ده اللي بيولد شعور بالحسد عند بعض الناس. لكن في فرق بين الحقد والحسد، الحقد هو تمني زوال النعمة من عند الشخص الآخر أما الحسد هو إني أتمنى إن الحاجة اللي عند الحد ده تبقى عندي وغالبا الشخص اللي بيحسد بيكون ده من غير قصده”.


الكلمات المتعلقة‎