قال الفنانة أماني كمال، إن مسلسل “أبو العروسة” كان سبب في إن الناس تعرفها بشكل أكبر في الشارع.
وقالت أماني لمروان قدري خلال برنامج “عيش صباحك” على نجوم إف إم: “دور شيري كان دور لست محترمة وهادية وجدعة مع أصدقائها. والشخصية دي قريبة من شخصيتي الحقيقية وشبهي خصوصا في موضوع الكسوف وقلة عدد الصحاب الحقيقين أنا دايما عندي معارف كتير لكن أصدقائي المقربين والحقيقين هم واحد أو اتنين”.
وأضافت: “المسلسلات اللي عملتها قبل “أبو العروسة” زي كفر دلهاب وطاقة نور وغيره وكانت كلها في رمضان، كانوا بالنسبة لي وسيلة للانتشار، وبعد كدة كنت رافضة أعمل مسلسل 60 حلقة بعد رمضان لحد ما اتعرض عليا أبو العروسة وعرفت دوري فيه وحبيت المسلسل وحبيت دوري”.
وتابعت: “لما بتعمل عمل له صدى كبير بيفرق بعد كدة معاك كممثل وبيفرق ف اختيار المخرجين ليك”.
وعن دورها في مسلسل كفر دلهاب قالت: “دور كريمة في مسلسل كفر دلهاب بسطني جدا برغم إنه قد يكون بسيط ولكن اعتقد إنه كان دور مهم وهي كانت البطلة ومحور المسلسل برغم صغر وبساطة دورها”.
هل توافق على الرقابة؟
أما عن رأيها في الرقابة قالت: “أنا مع فكرة الرقابة على المسلسلات ومع تصنيف المسلسلات لأعمار معينة لأني لو رجع بيا الزمن كنت هختار أعيش كل مرحلة أو سن بسنة ومعرفش حاجة بدري أو ماشوفش حاجة بدري”.
وأضافت: “التغيير مطلوب جدا لأنه بيخليك تتعامل مع مدارس مختلفة، لكن أنا طبيعة شخصيتي بتفضل إني لو ارتحت مع شخصيات معينة في الشغل أكرر التعاون معها”.
وعن طريقة اختيارها للأدوار التي تقوم بها قالت: “حجم الدور والبطولة بالنسبة لي مش أهم حاجة في اختيار العمل الفني، أهم حاجات بالنسبة لي الورق الحلو والمخرج والمنتج”.
وقالت أماني: “ردود أفعال الناس على السوشيال ميديا عن دوري في “أبو العروسة” بسطتني جدا خاصة إن أغلبها كان إيجابي ومشجع”.
أما عن أحدث أعمالها الفنية قالت: “دلوقتي عندي فيلم هينزل على الصيف وغالبا هيكون في العيد الكبير”.
مواضيع ممكن تعجبك
