تستمع الآن

مستمعو “معداش عليك” عن “الشخص الرخم”.. الرخامة جزء أصيل فينا

الإثنين - ٠٨ يناير ٢٠١٨

ناقشت سارة النجار في أولى حلقات برنامج “معداش عليك” في 2018، على نجوم إف إم، الشخصية التي تتسم بـ”الرخامة”.

وقالت سارة في مستهل الحلقة: “في ناس بتتميز بصفة الرخامة يعني لو جيبنا سيرة الرخامة هما أول ناس هتيجي في بالك دلوقتي، تحس إن هذه الصفة عضلة وفي ناس بتقعد تتمرن عليها عشان تقويها من كتر ما مستواهم بيعلى في الرخامة وبيزيد، بيجي عليهم سن الرخامة بتاع الـ7 سنين ده بس بيكمل معاهم باقي حياتهم”.

وأضافت: “من أنواع الشخصيات الرخمة اللي مكن تقابلهم في حياتك، البياعين بتوع وسط البلد اللي بيقعدوا يشدوك من دراعك عشان تشتري منهم حاجة، الشخص بتاع السينما اللي كل شوية يجيلك ويقولك مساء الخير، الصاحب اللي توريله الموبايل يشوف صورة فيقلب في باقي الصور”.

وقالت مولي: “أولاد خالتي جيناتهم فيها الرخامة والمشكلة إنهم يضحكوا سويا على رخامتهم، وحتى المدرسين أشعر أنهم برخمتهم”.

وشدد يوسف: “في شعب مصر بسم الله ما شاء الله الرخامة فينا حاجة أساسية، وممكن شخص نائم بالليل ويأتي شقيقه ويشعل سيجارة، وأيضا الناس المحبطة في الأحلام هو جزء من الرخامة التي أقابلها”.

وأشار محمد: “التعامل مع الشخصية الرخمة فن، مثلا ممكن تستخدم التجاهل كرد على رخامة شخص معين وإنك تحاول تعتبره مش موجود وتحاول تحسسه إن رخامته دي مأثرتش عليك، ابتسم في وجهه بس وإنت بتحسسه إنك بتاخده على قد عقله، حاول تحط أعصابك في ثلاجة وإنت بتتعامل معاه”.

وشددت سارة في نهاية الحلقة: “في النهاية عايزين نقول إن مفيش أحسن من إنك تكون مبتسم في وش الناس ومتطلبش منهم فوق طاقتهم وإنك تكون لطيف معاهم وخصوصاً لو الناس دي قريبين منك أصحابك أو ناس شغالة معاك، لأن طبعاً الابتسامة في وجه أخيك صدقة وكمان إننا كلنا بنواجه نفس الضغوط والمشاكل اليومية بنسب متقاربة، فمش مستاهلة تبقى رخم مع حد أو تزعل حد خليك كويس ولطيف مع الكل وصدقوني سترد لك المعاملة بالمثل من اللي حولك”.


الكلمات المتعلقة‎


مواضيع ممكن تعجبك