تستمع الآن

أخصائي الطب النفسي لـ”معداش عليك”: النقد البناء أنسب طريقة للتعامل مع “متقلبي المزاج”

الإثنين - ١١ ديسمبر ٢٠١٧

ناقشت سارة النجار، يوم الإثنين، عبر برنامج “معداش عليك”، على نجوم إف إم، شخصية “متقلبي المزاج”، وكيفية التعامل معهم.

وقالت سارة في مستهل الحلقة: “متقلب المزاج هو إنسان كل دقيقه بحالة وبإحساس مختلف عن اللي قبله، وهذا سبب كافي إن الشخص ينكد على نفسه كل شوية، وتعتبر الشخصية المزاجية مركبة ومليانة تناقضات، وطبعا التعامل مع أصحاب هذه الشخصية بيبقى شيء صعب ومجهد ﻷي حد بيتعامل معاها، فممكن تلاقيه الصبح كويس معاك ومبسوط وفي الليل يتحول عليك ويبدأ يلومك على حاجات عملتها من سنتين مثلا أو حاجات إنت اتصرفت فيها بعفوية مطلقة”.

وعن كيفية التعامل مع متقلب المزاج، أشارت: “لازم تقرأ طباعه كويس اللي غالبا بتبقى باينة على وجهه وانفعالاته عشان يبقى سهل عليك في التعامل معه، وجه له السؤال المناسب في الوقت المناسب، لو شوفت ردة فعله على كلامك معاه سلبية وقف الكلام معاه وحاول تنسحب من المناقشة بهدوء، لو اضريت تكلمه وهو غضبان حاول تقف في صفة وتحاول تهديه وبعد كده بطريقة كويسة تحاول تقول له الصح لو غلطان وتقول له إيه رأيك لو نعمل كذا أو كذا، عليك أن تدعمه معنويا وتحاول تساعده وتحل له مشاكله ونبعد عنه الضغوطات المزعجة، تحاول تفاجئه بهدية حلوة بسيطة هو بيكون بيحبها في وقت يكون فيه حالته المزاجية سيئة بحيث إنك تخرجه بسرعة من الحالة دي”.

وقال نور أسامة، أخصائي الطب النفسي: “متقلب المزاج هو عبارة عن اضطراب نفسي عادي لو زاد عن الحد يتحول لهوس، ولكن نفرق بين حاجتين الشخصية المزاجية المؤقتة والدائمة، مثلا عند السيدات أثناء الدورة الشهرية أو الحمل هي أمور تتقلب فيها المزاج وهي أمور مؤقتة، ولكن المتقلب دائما راجعة لمشكلات أسرية مثل القسوة في التربية وعدم الشعور بالأمان ويكون مهمل أو محروم من الحب أو التربية القاسية اللي مافيهاش مرونة، والشخص المزاجي عنده وقت فراغ كبير أو حساس أو يكون أصلا مش عارف عايز إيه شخصيته غير موجودة أو هدف يصل له، وكل ما يصل لمرحلة لا يعرف هل ما وصل له صح أم خطأ أو لا يفكر جيدة في العواقب في الانفعال الذي ارتكبه”.

وأضاف: “تقلب المزاج يؤثر على شخصيتك وممكن لو زاد يأتي بمرض السكري أو الضغط، أعراض هذا الاضطراب لاحساسه المستمر باليأس وتتحول لشخصية مذبذبة، المفروض أعرف هدفي وحلمي وأضع الدوافع، وفيه دافع خارجي مثلا يدفعني للأكل والشرب، والمهم يكون لدينا فكرة الرضا أيضا وأي شيء بيحصل هو نصيب وقدر وربنا كاتبه لي، وأنا علي أفعل ما أقدر عليه، وبداية العلاج هو الاعتراف بوجود المشكلة، وأنا عليّ أتعامل معه بشكل طبيعي وهو هادئ أقول له أنت عندك حاجات كويسة ولكن في النصف عندك مشكلة ما، ثم أكمل كلامي بشكل إيجابي المهم النقد البناء”.

وقال أول متصل “حسام”: “أنا شخص متقلب المزاج وأنا إنسان بحب البيت أيضا وبما إن عملي في مجال الإخراج سيطرت علي فدائما أتعامل بوجوه مختلفة، وخصوصا كمان أنا برج العقرب ودائما الناس لديها هاجس في التعامل معي، وإحنا مش عارفين نحدد حالتنا الحقيقة، وأكثر جملة تعصبني (معليش)”.

وأشار عصام: “خطيبتي هي الشخصية المتقلبة المزاج، أكلمها وفجأة تقلب وأقول مالك مافيش، والقلبة تكون سيئة جدا وتتذكر مواقف من 100 سنة ولكن تلك الشخصيات غلابة جدا في النهاية”.

وشدد متصل آخر: “‏كونك شخص متقلب المزاج بيخليك محتاج معاملة خاصة محتاج لشخص يأخذك زي ما إنت يحتويك يحترم إحساسك الزايد تراكماتك اللي مبتعرفش تحكيها.. وإنت دورك إنك لما تلاقي بيحاول يساعدك ساعده إنت أيضا ولا تقوم بصده أو تهرب منه.. مفيش حد مفيهوش عيوب بس الشاطر هو اللي يحاول يصلح من نفسه مهما كان هذا الأمر صعبا”.


الكلمات المتعلقة‎


مواضيع ممكن تعجبك