تستمع الآن

نصائح ثمينة يقدمها مصري مقيم في روسيا للمشجعين قبل السفر لدعم المنتخب

الإثنين - ٠٩ أكتوبر ٢٠١٧

بعد تأهل المنتخب المصري إلى كأس العالم 2018 في روسيا لم يكف المصريين عن البحث عن أبرز طرق السفر لتشجيع المنتخب المصري في المحفل العالمي الذي غاب عنه الفراعنة منذ 28 عاما.

ووفقا للخبر الذي قرأه خالد عليش، عبر برنامج “معاك في السكة”، يوم الإثنين، على نجوم إف إم، فقدم محمد رأفت، المقيم في روسيا، نظرًا لعمله، عدة نصائح ثمينة للمتجهين من مصر إلى روسيا في أثناء مسابقة كأس العالم.

1- الروس مش بيحبوا يتكلموا إنجليزي يعني محدش هيفهمك ولا أنت هتفهم حد.

2- ستات روسيا مش قاعدين في المطار مستنيين وصولك.

3- الروس عنصريين ومش بيحبوا الأجانب عمومًا.

4- اعمل أي حاجة في روسيا إلا الاغتصاب والمخدرات والإرهاب، غير كده عيش يا معلم.

5- في روسيا ممنوع التدخين بالأماكن المقفولة وفي الحدائق العامة ومحطات الأوتوبيسات اللي في الشارع.

6- لو هتمشي تتكلم بصوت عالي وتضحك بصوت عالي في الشارع هيبصولك بقرف.

7- لو بصيت على واحدة وتنحت ممكن تقولك بتبص على إيه وممكن تتخانق معاك.

8- الروس عندهم استعداد للاشتباك بالأيدي والمشاجرة في أي وقت وأي مكان.

9- الجو شهر 6 في روسيا بيبقى عامل زي آخر أسبوعين في مارس بتاع مصر وممطر.

10- أبوس إيدك بلاش تحرش.

11- ضابط الجوازات في المطار من حقه يرفض دخولك البلد دون أي سبب، وبتحصل كتير أوي أوي اليومين دول.

12- ليك مهلة أسبوع من وصولك البلاد وتعمل حاجة كده اسمها ريجستراتسا (ورقة كده مكتوب فيها مكان إقامتك ومدة إقامتك جوه البلد)، ولو مش معاك الورقة دي والشرطة وقفتك المفروض قانوني بتدفع غرامة 7000 روبيل في البنك الوطني الروسي أو بتاع الشرطة هياخد منك فلوس ويسيبك.

13- ممنوع السير في الشارع وأنت شايل في إيدك إزازة خمرة وماشي بتشرب منها.

14- أرجوك بلاش تحرش.

15- في روسيا محلات السلاح أكتر من مطاعم ماكدونالدز وغالبية الشباب معاهم سلاح أبيض أو مسدس بيضرب بلي بيعور.

16- نسيت أقولك إنهم شايلين السلاح بالتصريح بتاعه عادي خالص.

17- حاول متتصاحبش على حد علشان هم أصلا مش بيحبوا الأجانب في الغالب هيبقى عايز يعمل عليك مصلحة ويستغلك.

18- حاول متغيرش فلوس غير في البنك أو مكاتب الصرافة وخلي بالك الفلوس المضروبة كتيرة هنا.

19- نسبة كبيرة من الروس نزلوا مصر وداقوا حوارات المصريين.

20- بلاش معاكسات أرجوك وخليك واجهة حضارية لبلدك.

21- هتعدي الشارع بص على الإشارة ومتعديش غير في إشارتك علشان لو اتمسكت هتدفع غرامة.

22- كل محطة أوتوبيس بيبقى متعلق فيها يافطة مكتوب فيها أرقام الأوتوبيسات اللي بتعدي عليها ومواعيدها.

23- روسيا فيها كاميرات في الشوارع والمحلات ومداخل البيوت والمولات والعمارات ومفيش خرم إبره مفيهوش كاميرا.. الكل متراقب.

24- باسبورك زي جلدك متروحش في حته من غيره هو والريجستراتسا والورقة الصغيرة اللي هتاخدها من ظابط الجوازات في المطار.

25- الورقة اللي هتاخدها من ظابط الجوازات في المطار اسمها إيميجراسيونا كارتا هتسلمها تاني في المطار وأنت مغادر.

26- باسبورك لو ضاع تتوجه لأقرب قسم شرطة وتعمل محضر وبعدين تتوجه للقنصلية وتشوف هيعملوا إيه معاك.

27- موسكو فيها شبكة مترو أنفاق كبيرة جدًا وكلها تحف معمارية من ثلاثينات القرن اللي فات وبيسموها قصور الشعب نحو 14 خط مغطية العاصمة كلها حاول متتحركش جواها لوحدك وأنت لسه جديد علشان هتتوه.

28- حاليًا الجنيه عامل نحو 3.6 روبيل، ومتفتكرش إن فرق الأرقام ده معناه أنها دولة فقيرة.. لو قعدت في مطعم وأكلت وشربت واتبسطت مش هتدفع أقل من 1000 روبيل يعنى نحو 300 جنيه.

29- روسيا في الصيف جميلة جدًا واللون الأخضر يسر العين لكن في الشتاء جحيم بارد.

30- موسكو من أغلى العواصم في العالم أعمل حسابك في فلوس كتيرة.

31- هتكسر فيزا هتعيش زي المطاريد أو هتتمسك وهتروح محكمة وهتاخد ورقة طرد لازم تغادر خلال 10 أيام وهتاخد ختم حرمان 5 سنين.

32- معظم المحلات والمولات والمطاعم والصيدليات بتقفل من 10 مساء ما عدا محلات الورد 24 ساعة شغالين وبعض الصيدليات.

33- حاول تعرف كام كلمة روسي غير خراشو علشان تعرف تتعامل هنا “اسمها خراشو مش خراشوف على فكرة”.

34- أول ما تقوم من النوم أعرف الطقس ظروفه إيه علشان هتلاقي شمس وهوا وسحاب وبرق ورعد في يوم واحد ولازم يبقى معاك شمسية وإلا هتتبل بجد.

35- عادي أوي أن حد يوقفك ويشحت منك سيجارة، هنا الكيف مناولة مش مقاولة.

36- معظم الشعب معندهمش ثقافة الاستئذان من حد علشان يعدي فطبيعي لو لقيت حد زقك في طابور أو في المترو أو أي حتة علشان يعدي أوعى تقفش وتتخانق لأن ده الطبيعي بتاعهم هو مش شايف نفسه قليل الذوق وبعدين حضرتك تركب.

37- لما المترو يقف حضرتك تقف على جنب لحد ما الركاب اللي نازلين ينزلوا وبعدين تركب.

38- وأخيرا.. بلاش تحرش.


الكلمات المتعلقة‎


مواضيع ممكن تعجبك