تستمع الآن

“أصل وفصل”.. “بوجي وطمطم” لماذا أطلق عليهم رحمي هذه الأسماء؟

الأحد - ١٨ يونيو ٢٠١٧

استعادت آية عبدالعاطي، عبر برنامج “أصل وفصل”، على نجوم إف إم، واحدة من أجمل الذكريات الرمضانية على قلوب الجميع وهو مسلسل “بوجي وطمطم، لتحدثنا عن أصله وفصله.

وقالت آية: “قبل ما تفاصيل رمضان تبقي كثير جدا، وقبل ما المسلسلات والإعلانات تبقى أكثر وأكثر وأيام ما كنت الكنافة مجرد كنافة، كان أيام بوجي وطمطم، طمطم الأرنبة وبوجي القرد، المسلسل اللي فضل يتقدم 18 سنة في رمضان وكنا كمشاهدين متصالحين جدا مع إن أرنبة وقرد بيتعاملوا إنهم من الناس عادي جدا.. هو مين ماكنش بيستنى مسلسل “بوجي وطمطم” الكبير قبل الصغير”.

وأضافت: “بعد التتر بتاع حلقة بوجي وطمطم ما يخلص كنا بنلاقي بخط كبير اتكتب على الشاشه رحمي، أهو بقي الأستاذ محمود رحمي هو مؤلف ومخرج ومصمم عرائس بوجي وطمطم، وأصل الحكاية كلها عنده، الحكاية ابتدت لما فكر إنه عايز يعمل عرايس مصرية خالصة تكون بتعبر عن الأفكار والتراث المصري، ومن الرسم على الورق، لخيوط وألوان طلع منها أول 4 شخصيات أساسية في المسلسل، بوجي وطمطم وزيكا وزيكو، ومع نجاح المسلسل بقى كل سنة يضيف شخصية، سنة يضيف عم شكشك واللي بعدها يضيف أبو عم شكشك”.

وتابعت: “فكرة مسلسل بوجي وطمطم اتحمس لها كثير من الفنانين، وكان من أول المتحمسين الشاعر صلاح جاهين، وكتب أغنيات تتر المسلسل لمدة سنتين وراء بعض وكتب أشهر أغاني الفنان بوجي بطني بتوجعني والفيل الجميل”.

وكشفت: “فضل سؤال الناس بتسأله، ليه اسم بوجي وليه اسم طمطم، يمكن بوجي رد على السؤال ده في واحدة من الحلقات وقال لطمطم بوجي يعني بؤجة يا طمطم، لكن ده كان مجرد هزار على لسان بوجي.. لكن الحقيقة إن بوجي كان اسم أخو الأستاذ رحمي الكبير، أما طمطم فهي دلع اسم فاطمه عادي يعني، أما عم شكشك فدي ما كان مُتعب وداخل في حياة كل الناس من شباك بيته، كمان كان مرهق جدا في نحته، عشان يوصل للشكل اللي شفناه ده رحمي نحته 3 مرات، وفي الآخر طلع لنا عم شكشك، المفاجآة بقى إن عم شكشك ده مع أخر مواسم عرض بوجي وطمطم كان في خطه إنه يبقى ليه أخت اسمها شكشوكة، بس توفي الفنان محمود رحمي قبل تنفذها، لكن نفذتها زوجته وهي موجودة في بيت رحمي هي وكل عرائس مسلسل بوجي وطمطم، المسلسل اللي عمرنا ما هننساه، يمكن كمان نستني إنه يرجع تاني وفيه شكشوكة”.


الكلمات المتعلقة‎


مواضيع ممكن تعجبك