تستمع الآن

متصل لـ”للرجال فقط”: مراتي بتسرح شعر السجادة بالمشط!

الثلاثاء - ١٧ يناير ٢٠١٧

بدأ الثنائي كريم الحميدي وأكرم حسني حلقة برنامج “للرجال فقط”، بالتأكيد على أنه برنامج عنصري ينحاز للرجال في كل البلدان العربية، قبل أن يتحدثوا عن موضوع الحلقة وهو قدرة الست المصرية على التلكيك.

وقال الثنائي: “أهلا بكم في البرنامج الأول المناصر لحق الرجل والقادر على العكننة على الستات بشكل مرضي بالنسبة لي، نكرر للمرة المليون البرنامج عنصري ينحاز للرجل في كل البلدان العربية، وأنا وكريم نجهز للجزيرة والتي ستكون باكورة أفكارنا في البرنامج”.

وتابع أكرم حسني “الستات عندهم قدرة غريبة للتلكيك على أي حاجة وهذه الصفة ليست موجودة عند أي ست في العالم إلا عند الست المصرية، هاتوا أي فكرة مسالمة واعرضها على أي ست، عظيمة في ابتكار أفكار للتلاكيك، لو جبت لها ورد تقولك ليه هات حاجة تتاكل أفضل، لو لم تأت بالورد لقولك أنت لم تعد مهتم مثل زمان”.

وأكد الحميدي “عن تجربة شخصية فيه خناقات بتحصل وتنتهي ولا أعرف ما السبب، وفي بعض الأحيان بعتذر رغم أني مش عارف أنا عملت إيه”.

فيما أضاف أكرم: “مؤخرا اشتريت كلبين وموجودين خارج البيت وزوجتي بتخاف قليلا هم جروين صغيرين ودخلوا البيت فجأة، وقامت خناقة، إيه المشكلة ما انا مش كلب وهقعد اتكلم معاهم وأفهمهم إني اللي عملتوه ده غلط”.

وجاء أول اتصال هاتفي من صلاح، الذي قال: “بتصعب على نفسي متزوج من 7 سنوات، كان فيه مؤشرات من الخطوبة ولم اتخيل ان الموضوع كبير بهذه الدرجة، مراتي عندها هوس بالنظافة والنظام وابسط خناقة تقوم بيننا بسبب إني نعكشت شعر السجادة، زوجتي بتسرح شعر السجادة بالمشط، كل حاجة لازم تكون بنظام ولو قلت لها قادم البيت تقولي بعد كام دقيقة بالظبط أو كام ساعة، ولازم أكون محدد واعرفها وقت وصولي بالضبط. أنا تعودت ولكني خايف على بناتي بتعمل معهم إيه ذنب البنت عندها 3 سنوات تمسك المشط وتسرح السجادة”.

أما دكتور محمد، فقبل بداية حديثه أعلن تعاطفه مع صلاح وطالب بضرورة الاطمئنان عليه، قبل أن يسرد قصته “اشتريت حذاء ولسة بطلعه من العلبة بتاعته وبلبسه في أوضة النوم قامت خناقة عشان لازم ألبسه على باب الشقة، ولما قلت إنه لسة جديد، كان الرد ما أنت قيسته في المحل على الأرض، ده خرق لنظام البيت، انت لازم تلبس الحذاء على باب الشقة”.

وكان الختام مع أحمد، الذي قال: “قمتم بفتح قضية تحتاج سنوات لمناقشتها. دائما ما تكون النظافة هي السبيل الأهم للتلكيك، مثلا مستحيل أنا ولا حد من الولاد ندخل البيت بالجزمة، يا نهار أبياااض تقوم حرب، لازم نقلعها على الباب ونلبس الشبشب المخصوص لكل واحد. ده لو نزلت الجراج بتاع العمارة لازم اطلع استحمى من أول وجديد، ربنا يهديهم بقى”.


الكلمات المتعلقة‎


مواضيع ممكن تعجبك