تستمع الآن

مستمعو “معاك في السكة” يشكلون وفدًا مصريًا لحل أزمة طلاق “برانجلينا”

الأربعاء - ٢١ سبتمبر ٢٠١٦

ناقش خالد عليش عبر برنامجه “معاك في السكة”، على نجوم إف إم، يوم الأربعاء، خبر طلاق أنجلينا جولي وبراد بيت والذي شغل الوسط الفني مؤخرا.

وطلب عليش من مستمعي نجوم إف إم، اقتراح أسماء ووفد مصري للذهاب إلى هوليوود لحل الأزمة بين “بيت وجولي”، وجاء أطرف التعليقات على الموضوع كالتالي، حيث قالت مروة: “كلهم براد يا خالد، كانوا فضلوا يحبوا بعض من غير جواز أحسن، ومن رأيي إن اللي يصلح بينهم الفنانة إنعام سالوسة”.

وشددت سمر: “أنجلينا محسودة، وزمانها دلوقتي بتغني لسميرة سعيد (أديني سيبته ومحصلش حاجة)، ومن رأيي الفنانة فردوس عبدالحميد تروح بوفد مصري وتخلص القصة ويرجعوا لبعض”.

فيما قالت شاهيناز: “زعلانة والله على اللي حصل، بس أنا كنت عارفة من ساعة ما اتجوزوا إن ده هيحصل، لأن هي أخذته من جينيفر أنستون، والدنيا دوارة، واللي هتعمله النهاردة بكرة هتلاقيه بكره، وأكيد كان هيسيبها عشان واحدة تانية، كله بيعدي والرجالة على قفا من يشيل يا أنجلينا”.

وأوضحت مروة: “الدنيا دوارة يا عم خالد، والموضوع ده جاي في وقته بالنسبة لي، وزمان أم أنجلينا دلوقتي قاعدة عمال تقولها بلاش تخربي بيتك، والمهم ده بيته وبيلف ويرجع لك يا بنتي، وأنا كمروة نفسي أخذ القرار زيها”.

فيما كان للمتصل “آمر” رأي آخر، مشددًا: براد بيت عنده حق، والناس كلها اللي بتتصل فاكرة الناس خاينين، ولكن أنجلينا غلطانة، خست 50 كيلو قال إيه تعاطفا مع اللاجئين، وعمالة تجيب له عيال وتتبناهم، وافتكرت نفسها لما بقت زي سلك الكهرباء هتبقى أحسن، وراحت عملية استئصال للثدي خوفا من السرطان وهي معندهاش أصلا، وأنا رجل عايز أعيش حياتي وفرفوش، ونصيحة للست المصرية دلعي زوجك عشان الرجل يفضل معاك، ومن رأيي الكابتن مدحت شلبي أفضل حد يحل هذه المشكلة هو اللي بيقدر يجمع الناس اللي مينفعش يقعدوا مع بعض”.

واقترحت مريم: “أرى أن أنسب شخص لحل هذه الأزمة هو المستشار مرتضى منصور، هو اللي يروح يخلص، لأنا أقول لأنجلينا إنت ست زي الفل وألف رجل يتمناكي، ولكن ممكن نسبة الطلاق ترتفع في مصر بسبب هذه القصة، والرجل يقول لمراته اشمعنى أنجلينا اتطلقت، يلا عند الست والدتك”.

وأشارت غادة: “إحنا مش عارفين إيه اللي حصل أساسا حتى الآن، ولكني لي تعليق من كلام الرجالة اللي بتصل وتعلق بتقول ده برنس وكويس وبرافو عليه، هو الرجل لما يخون مراته هل هذه حاجة يفخر بها، أنت اخترتها بكامل قواك العقلية فلماذا تقوم بخيانتها لو هي مش مالية عينك، اتطلقوا باحترام أفضل من الخيانة، وبراد بيت نزل من نظر الستات كلها، ولو مكانها سأنصحها بعدم الرجوع له، وحتى سأتنازل عن كل حاجة وهتعمل إيه بأموال الدنيا هو خلاص ذبحها”.

اقرأ أيضا.. “برانجلينا” ليست الأولى..أشهر حالات الطلاق التي سببتها الخيانة في هوليود


الكلمات المتعلقة‎