تستمع الآن

للرجال فقط.. الستات ما بيعرفوش يسكتوا.. ومتصلات: ده أسلوب حياة عندنا

الثلاثاء - ٠٦ سبتمبر ٢٠١٦

ناقش الثنائي كريم الحميدي وأكرم حسني عبر برنامجهما “للرجال فقط”، أزمة “الرغي” عند السيدات.

وقال كريم وأكرم في مستهل الحلقة، على نجوم إف إم، يوم الثلاثاء: “مفيش ست مصرية اتولدت أو ستولد من المحيا إلى الممات إلا وتعيش بهذه الصفة الأصيلة، الست المصرية ليه بترغي هم أساتذة في اللت والعجن، وفيه تقسيمة للرغي ما بين هري ونميمة وشائعات هناك تخصصات، وتتكلم على الفاضي والمليان”.

وأضافا: “تبقى في شغلك وتتصل وتقولك ابننا آدم مشي.. ولو قلت لها طيب أنا في اجتماع تتهمك (إنك مابقتش مهتم زي زمان)”.

وتابعا: “الستات بتحكي لنا تفاصيل كثيرة وإحنا كرجال لا تهمنا أصلا، أنا مالي كابتن أيمن مدرب السباحة بتاع الأولاد خطب، الراجل لما بيبقى قاعد ساكت مابيبقاش محتاج حد يتكلم معه وهذه معلومة لكل سيدة مصرية.. وأنا لما أبقى قاعد مأنتخ هذا قرار اختياري اتركونا في حالنا”.

وتساءلا: “ليه الست بتهري، والرجل اللي بيرغي كثيرا يقال عليه منسون”.

وقال أول متصل ويدعى “رامز”: “زوجتي معترضة على ما تقولونه، وأنا أعمل مدرس وبروح وعايز صمت ومش عايز أسمع حاجة، بس يقولوا كلام مهم، وأنا مش عايز أعرف حاجة عن حد، وبعمل نفسي ساعات مهتم ولكن الحقيقة أنا مش ببقى سامع حاجة”.

وهنا تدخلت زوجته “مارتينا”، قائلة: “لازم المشاركة في كل حاجة، وهو آدم اللي مشي ده يبقى ابنه، فالأم تبقى مبسوطة وتريد أن تشارك الأب، وأنا بحب أرغي في كل حاجة، ولازم يبقى فيه طرف رغاي، ويجب أن يكون هناك توازن، وبحب أهري في أحداث اليوم”.

فيما أشارت سمر: “أنا رغاية لدرجة زهقت ماما، وكل الموضوع علطول عايزة أعرف أخبار أهلي إيه، مثلا أتصل بزوجي وأقول له ابنك زهقني وتعبني، وعارفة إني غلط بس أنا ببقى مخنوقة وعايز أشاركه في أزمتي، وأي حاجة تحصل أتصل أشكو له، هذا أسلوب حياة عندنا كستات”.

وأضافت: “أكثر حاجة تضايقه في الشغل لما أتصل أقول له تأكل إيه النهاردة، وهو يكون مشغول جدا والناس حوله، ويقول لي أي حاجة يا ستي إنت بتتصلي في أوقات غريبة جدا، وجوزي تعبان معي، ولما بيتفرج عليكم بيفضل يشيد بكم وأنا بتغاظ جدا”.

أما فاتن فتحدثت عن الرغي عند المرأة، مؤكدة “الموضوع ملوش علاقة بالرغي قد ما بنكون عايزين نشارك أحبابنا وأصدقائنا أحداث حياتنا ويومنا حتى لو معتادة، قصة مشاركة مش أكتر”.

أسماء جاءت إجابتها مقتضبة، مؤكدة “لا احنا مش رغايين احنا لو لقينا الي يسمعنا ويفهمنا اكيد مش هنتكلم كتير، ورغم اني مش متجوزة ولا مخطوبة إلا اني اعتقد لو ده حصل فبيكون بسبب طبيعة في شخصية وتركيب الست بتتغير بعد الارتباط”.

وسرد أحمد تجربته المختلفة تماما، ليكون أخر مكالمة في الحلقة “ظللت 18 عاما متزوج من مصرية ثم حدث طلاق وتزوجت من لاتفيا، لاكتشف أن الرغي سمة خاصة بالسيدات المصرية، قسما بالله الجوازة الجديدة نستني الـ18 سنة”.

وأتم أحمد “الكلام بحساب وفي مواضيع هادفة، الاهتمام والرعاية بشكل لا يمكن لأحد أن يتخيله، حقا التجربة رائعة بدون أدنى شك”.


الكلمات المتعلقة‎


مواضيع ممكن تعجبك